Gutta på tur

I alt møtte det opp 35 turdeltakarar denne dagen.

21 av desse gjekk turen i Handelandsdalen.

Bilane blei parkerte på parkeringsplass ca. 200 m ovafor Handeland gard. Turen gjekk på skogsveg oppover Handelandsdalen. Ca. 1,2 km frå parkeringsplassen gjekk me forbi gapahuken på Feto, og vidare derifrå gjekk me ca. 500 m oppover dalen. Der snudde me, og gjekk tilbake til gapahuken der me hadde matpausen. Siste strekningen fram til gapahuken gjekk me ca. 200 m på «gamlevegen», som går parallelt med den nyare skogsvegen.

-o-o-o-

Det var 14 turdeltakarar som gjekk alternativ tur til gapahuken i Skipåsen på Stord.

I alt møtte det opp 46 turdeltakarar denne dagen.

31 av desse gjekk turen sørover frå Øvrebygda skule i retning mot Svartasmoget.

Bilane blei parkerte ikkje langt frå  Øvrebygda skule. Turen gjekk på skogsveg sørover med stigning frå 37 til 150 moh.  På turen oppover gjekk me forbi 4H gapahuken, som ligg på austsida av Klovadalsstjørna. Vidare gjekk me på vestsida av Osphovdetjørna fram til Osphovda, også kalla «flasko», som er eit vanleg turmål for folk i Øvrebygda. Der har Øvrebygda Vel sett opp kasse med turbok i. På turen vidare opp mot det høgaste punktet på skogsvegen (150 moh), passerte me staden der stien til Surefjell tar av frå skogsvegen. På toppen var me ca. 2-300 m frå Svartasmoget, og hadde utsikt mot Rubbestadneset. Me snudde på toppen av skogsvegen, og gjekk same vegen tilbake til bilane. På veg nedover tok me matpausen i 4H gapahuken, som me hadde gått forbi på veg oppover.

-o-o-o-

Det var 15 turdeltakarar som gjekk alternativ tur i Hustrudalen.