Gutta på tur

I alt møtte det opp 34 denne dagen

20 av desse var med på turen til Brandviklia og Haukanes.

Turlengd i Brandviklia (rundtur): Ca. 2 km
Turlengd til Haukanes: Ca 1 km

Turleiar: Harald Huglen
Lokalkjent guide: Johanne Bjørg Molvik

Bilane blei parkerte på parkeringsplass der hovudvegen fram til Haukanes sluttar. Me starta å gå inn i Brandviklia frå parkeringsplassen. Brandviklia ligg i Brandvik landskapsvernområde. Etter å ha gått 8-900 m sørover i skog med mange ulike tre- og planteslag, kom me fram til Meåsen der det var matpause. Guiden har ein eigedom der med fin terrasse og bord og stolar som me fekk bruka. Og det var flott utsikt mot sjøen og Litla Tveitøy, Storøya og Bleikjo som låg ca. 1 km frå land. Etter matpausen bar det inn i skogen igjen, nordover mot parkeringsplassen. Også her var det mange tre- og planteslag. Det var mellom anna mykje barlind å sjå. Guiden var kunnskapsrik, og flink til å formidla informasjon om det me såg, til oss. Då alle var tilbake til parkeringsplassen, hadde me tid til å gå ein tur norover til Haukanesgardane. Der var det også mykje fint å sjå. Det var fin utsikt mot sjøen, og mot Laukhammar som ligg heilt sør på Skorpo.

Kartutsnitt der turtraseen er teikna inn med blå strek.

ALTERNATIV TUR

Det var 14 turdeltakarar som gjekk alternativ tur.

Dei gjekk tur i området Høgskulen Vestland på Rommetveit, parken der, Klingenbergkaien, og opp på terrassen til Arne Trageton der kaffi og niste blei fortært i ein flora av Rhododendron.

Alle foto på alternativ tur: Bjørn Østrem

I alt møtte det opp 33 denne dagen.

16 av desse var med på turen til Agdesteinfjellet.

Turlengd: ca. 5 km.

Turleiar: Arne Haugland.

Turen starta frå parkeringsplass på Heio, ca. 200 m nedanfor bommen på Kattnakkvegen. Me gjekk først bort til «Steinen» der me hadde ein liten pause. Derifrå gjekk me ca. 1 km nedover dalen før me snudde til høgre og følgde høgspentlina opp ein annan dal. Me tok ein avstikkar på 200 m til venstre ut til kanten av Agdesteinfjedlet der det var matpause. Frå denne staden er det vid utsikt søraustover mot store delar av Sunnhordland. Frå Agdesteinfjedlet gjekk me same vegen tilbake til høgspenlina, men gjekk derifrå inn på sti som går aust for Hetlesætertjødno tilbake til parkeringsplassen. På turen fekk me sjå hoggorm, spretne froskar og hjort, og gauken gol rett som det var. Det var stor semje om at dette hadde vore ein kjekk tur.

ALTERNATIV TUR

Det vart 17 turdeltakarar som gjekk alternativ tur.

Johannes Belsvik leia turen som gjekk rundt Frugardselva, med matøkt ved Ådlandsvatnet.

Nordbygdo ungdomsskule hadde utflukt ved vasskanten. Ein flott ungdomsgjeng, med eksemplarisk oppførsel. Dei hadde ikkje noko i mot å koma på heimesida vår (stordgutta.no).

Oddbjørn Kvålsvold

Alle bildene er tatt i Ådlandsvikjo. Foto: Oddbjørn Kvålsvold.
Samtykke til fotografering av ungdomsskuleelevane frå Nordbygdo ungdomsskule er innhenta.

I alt møtte det opp 35 turdeltakarar denne dagen.

21 av desse var med på turen til Bjoa og Vikebygd.

Turlengd Eikås-Vikestølen: 2,7 km
Turlengd Vikestølen-Vikebygd: 4,8 km
Turlengd Eikås-Vikebygd: 7,5 km

Turleiar: Oddbjørn Kvålsvold

Bilane blei parkerte på parkeringsplassen ved Arquebus-minnesmerket på Eikås. Alle turdeltakarane gjekk frå Eikås til Vikestølen der det var matpause med medbrakt niste. Etter matpausen gjekk 14 deltakarar vidare til Vikebygd. Dei sju andre, som var sjåførar, gjekk tilbake til bilane sine på Eikås. Dei køyrde derifrå via Innbjoa og Utbjoa til Vikebygd der dei møtte dei som hadde gått heile turen frå Eikås til Vikebygd. Der var det bestilt viltgryte med tilbehøyr og kaffi på «Gamlatunet» til heile turgjengen. Både fotturen, og måltidet etterpå, blei ei fin og minnerik oppleving.

Kartutsnitt der turen er teikna inn med blå strek. Foto: Sigmund Erland

ALTERNATIV TUR

Det var 14 turdeltakarar som gjekk alternativ tur frå Vabakkjen til Aker Solutions sitt administrasjonsbygg, og vidare til Eldøyane. Tilbaketuren til bilane gjekk over Bjelland med matpause i hagen til Johannes Belsvik.